Strilesjefen Stella

Det er utan tvil det sosiale og sjølve festen som trekkjer strilane til Sommarfesten i idrettsparken. VIP-gjestene har fått i seg maten som Bergen Kokkenes Mesterlaug er ansvarleg for, og det smakte.

– Vi har scampi, ølmarinert pølse og svinekam, seier kokk Maja Torpe medan Jan Christian Heigl serverer smaksprøvar. Svinekammen er så mør at kjøttet ramlar frå kvarandre alt før det hamnar på fatet.

– Og her har vi salatbar, peikar Erich Heigl.

Nilsen først ut

Aktiviteten aukar i teltet der ein får kjøpt bongar som kan vekslast inn mot drikke og mat, og etterkvart blir VIP-maten erstatta med grilla pølser og hamburgerar. Kurt Nilsen skal på scenen, men det finst ikkje folk i konsertteltet.

Men når Nilsen først set i gang, sig folket på.

– Eg forstår jo at folk gjerne vil sitja ute og prata og kosa seg når vi først har fått fint vêr, seier festivalkonge Rolf Øvretveit.

Kurt Nilsen leverer som avtalt eit sett på halvannan time, og stemninga stig.

Heile fire artistar står på plakaten. Etter Kurt Nilsen kjem det for strilane ukjente bandet Aslan, eit band som er populært i heimlandet Irland. Dei var det ikkje mange av gjestene som fekk med seg.

– Eg skulle ønska at fleire fekk med seg konserten deira, for eg synest dei er knallgode. Men eg kan ikkje nett jaga folk inn, konstaterer Øvretveit.

Bongforvirring

I bongteltet er det både hektisk og underhaldande utover kvelden.

– Eg skal ha éin bong! seier ein vaksen mann bestemt.

Mannen betaler med kort, og seljaren legg kvitteringa saman med bongen og strekkjer ut handa for overlevering.

– Nei, den treng eg ikkje, seier mannen, og snakkar truleg om kvitteringa.

– Men skal du ikkje ha bongen din?

– Nei, har eg sagt, seier mannen og snur seg for å gå.

– Men du har jo betalt for bongen?

– Du kan berre hiva han, seier mannen avvisande og forlet teltet.

– Eg tar gjerne bongen hans, seier nestemann i køen.

Alt gjekk på skinner

At Stella Mwangi har meir å by på enn Melodi Grand Prix-låten «Haba Haba», blei ei positiv overrasking for mange. Det dampande showet fekk ein overmodig kar til å snika seg opp på scenen, men han blei raskt fjerna. Stella fekk ei travel helg på Sotra, med minikonsert på Sartor på dagtid på laurdag og konsertar både laurdag og søndag i idrettsparken.

– Tusen takk! De er eit fantastisk publikum, stråler Stella.

Kvelden blei avslutta med Abba-show frå England. Det blei litt kortare enn planlagt, då tidsskjemaet rauk alt med Kurt Nilsen.

– Men alt går på skinner. Folk oppfører seg fint, som vanleg. Artistane leverer, og dei frivillige og vaktane gjer ein kjempejobb, oppsummerer Rolf Øvretveit.