Meg, deg og Tiger Woods

PS3: EA Sports har vore spelkongen når det kjem til dei mest selde TV-spela i mange år. No har dei tatt steget vidare med Tiger Woods Pga Tour 08.

Spel med eige andlet
For no kan du lasta opp eit bilete av deg sjølv, lasta det ned att på Playstation-maskina di, og generera ditt eige andlete på spelaren din. Det høyres utruleg ut, men det er faktisk sant. Sjølv har eg prøvd, og etter ein time med fotografering, nedlasting og generering, sto eg der på den grøne virtuelle bana med eit drivande likt andlet, men kanskje i ei tynnare utgåve.

Golf mot nye høgdar
Det er morosamt å spela Tiger Woods. Sjølv om det beste er å stå ute på greenen sjølv, er det nærast som å stå der når du spelar Playstation3-utgåva av Tiger Woods. Det er ikkje mange spel som kan gleda, irritera og vera så frustrerande som dette golfspelet. Difor er det ikkje utan grunn at EA har vore leiande på denne typen spel i mange år.
16 banar kan du utfordra deg sjølv i frå sofakroken. I tillegg kan du no kontrollera slaget ditt i mykje større grad enn du kunne i tidlegare utgåver.
For meg vart det brått vanskelegare, og golfballen eg har slått avgårde, har møtt meir grus og kratt en nokon gong. Men det gjer ikkje spelet dårlegare. Tvert om. Det gjer spelet betre. Mykje betre. For når eg har stått der ute på ei ekte grasmatte med golfkølla i handa, har eg banna minst lika mykje som eg gjer frå sofakroken i handa.
I tillegg er det no lettare å spela på internett via konsollen din. Du treng ikkje vera avhengig av kameratar med same interesse for å spela med andre. Problemet er at dei på nettet er så utruleg gode.
Eit spel absolutt å anbefala. Terningkast seks for Tiger Woods Pga Tour 08.