Frisk FIFA Street 3 med feite Rooney på bana

Det er ikkje mykje seriøst i FIFA Street 3. Då snakkar eg ikkje om at spelet ikkje er seriøst, men det er heile settinga som er avslappa. Grafikken og speloppbygginga er meir teikneserieaktig enn i vanlege fotballspel, noko som er sterkt forandra i høve til tidlegare utgåver av Street-spelet. Har du spela SSX Tricky og NBA Street, så er dette spelet i same gate. Men i staden for galne hopp med snowboardet og kule jumps på basketbana, så er det sinnsvake skudd og vanvittige skåringar med heltane frå grasmatter verda over. Spesielt morosam er utfordringsmodusen der du kan turnera med ditt lag på fleire gatebanar. Dette spelet er og bygd opp slik at du må vinna kampar og gjera forskjellege ting for å låse deg opp vidare inn i spelet. Men det er jo det som er så utruleg morosamt. Som i SSX Tricky er det like viktig å gjera spektakulære ting med ballen som å skåra mål. Dette spelet er noko av det betre innan fotballsjangeren. Ta det frå ein som ikkje heilt har funne seg til rette i den virtuelle fotballverda.