Brennheitt bilspel

Slår du på Burnout Paradise, set deg godt til rette i sofaen og skrur opp volumet, vil du befinna deg i ein verden der dei råaste bilane regjerer og musikken til Guns n Roses vert kasta mot deg. Namnet på låta? Paradise City, vel. Det heile vert berre utruleg rått. Du startar sjølvsagt med ein av dei dårlegaste bilane. Men det er greitt nok, for det er ein bil du berre kan drøyme om å få køyra på norske vegar. Du har heile Paradice City til disposisjon. Du kan køyra kor du vil. Driv du berre dank, kan du møta på ein av dei mange andre råkøyrarane i spelet. Klarar du å «danka» dei ut, vinn du bilen. Det kan vera frå den treigaste racerbilen til den råaste utgåva i spelet. Langsmed vegen får du moglegheita til fleire oppdrag. Du kan køyra kappløp eller du kan ha burnout-konkurranse med andre. Eit av dei nye innslaga i dette spelet er at du kan vera jaga. Då skal dei andre bilane, med alle midlar, ta deg ut fortast mogleg. Det er absolutt heilt rått, for med den grafikken du møter i dette spelet, så er det duka for ein av dei største spelopplevingane du kan tenka deg på ein fjernsynsskjerm. Spelet får terningkast seks av meg, sju om det hadde vore mogleg.