Sjekkar ut Stril Kreisi til Komiprisen

TEATER: På lista over humoristiske innslag som skal vurderast av juryen for Komiprisen 2012, finn ein namn som Øyvind Blunck, Atle Antonsen, Bård Tufte Johansen, Harald Eia, John Cleese, Thomas Giertsen, Espen Eckbo og Hege Schøyen. Og Sotra teaterlag.

– Det er utruleg vittig å sjå teaterlaget på den lista, ler Yvonne Algrøy. Ho gledde seg stort til å formidla dette til medlemmene etter framføringa av revyen laurdag kveld. Det var same kveld som Komiprisen 2011 gjekk av stabelen på NRK1.

Det er sjølvsagt langt fram til ein eventuell Komipris 2012, det er i denne omgang trass alt snakk om å bli vurdert for mogleg nominasjon.

– Opptaket skal ikkje visast på fjernsyn, det er til juryen for Komiprisen. Men dette er uansett knallgøy for teaterlaget, meiner Algrøy.

Premieren på Stril Kreisi var smekk full.

– Eg trur vi hadde 220 menneske i teltet. Det er eigentleg fullt ved 200, smiler Trond Skeie i Sotra teaterlag. Han er stolt over å bli vurdert av juryen for Komiprisen.

– Det var ei positiv overrasking for oss. Det har ikkje skjedd før, smiler han.

Etter premieren har publikumstalet lege på mellom 150 og 160 menneske per framføring.

– Det er passe. Vi har hatt god stemning i salen, seier han.

Billettsalet i år er betre enn før. Stril Kreisi er den tredje revyen teaterlaget inviterer til i telt på Sotratrappo.

– Vi har revyen annakvart år, og billettsalet er aukande kvar gong. Slike ting må innarbeidast hos publikum, trur Skeie. Han reknar med fullt hus til helga.

– Det blir sikkert litt ekstra nervar når vi skal filmast. Men nervar må til, slår Trond Skeie fast.