Satsar på skikkeleg kalas for Kleppevik

KONSERT: Det er foreininga Torgdagen i Bergen som arrangerer 60-årsdagen til Johannes Kleppevik.

– Me har forsøkt å setta dette i Johannes si eiga ånd. Eg trur at han ville sett pris på at me lagar ein flott hyllest til ein 60-åring. Med det programmet me har, så håpar me at folk får sjå breidda og djupna av det Johannes har skapt, seier formann i Torgdagane i Bergen, Ketil Natvik til Vestnytt.

Fylte opp Grieghallen
Natvik kan lova dei som har kjøpt billett til konserten, ei oppleving av store musikalske dimensjonar.

– Me er faktisk utselde, og då snakkar me om kring 1500 billettar. Me har klart å fylla opp heile Grieghallen. Det seier ganske mykje, seier Ketil Natvik stolt.

Dei som kjem for å spela og synga Kleppevik-songar på laurdag er: Clive og dottera Claudia Scott, Ole Fjeld og dottera til Johannes Kleppevik, Marlen Kleppevik. Askøystrilane kjem. Det gjer og Heimalanne, som nettopp har gjeve ut ny plata «Godt å sjå deg». Per Golten kjem for å synga songar av Kleppevik. Tor Endresen, Bjørn Jensen og Ausekarane, kjem for å syna fram eit utdrag frå showet Haraball i naustet av Johannes Kleppevik.
Gruppa Spindel kjem. Det gjer og Tellnes Trio, som har spelt i mange år på Torgdagane. Steinslandsgjengen skal spela med Halvard Steinsland i spissen. Dessutan kjem Sund blandakor og Fjellkoret for å synga. Sotra Folkedanslag skal dansa i løpet av konserten.

– I tillegg skal Helga Golten vera programleiar, og Jimmy Øvredal har laga ein prolog, seier formannen for Torgdagane i Bergen.

Göran Fristorp kjem
Det store trekkplasteret på laurdagens konsert, er Göran Fristorp. Han kjem til å framføra fire songer av Johannes Kleppevik, med si eiga tolkning.

– Det vert spanande. Fristorp hadde høyrt om Kleppevik då me ringte han, men han hadde ikkje eit nært forhold til musikken. Då han hadde høyrt den, så sa han at det skulle vera han ein fornøyelse å vera med å hylla Johannes, fortel Ketil Natvik.

Konserten byrja Torgdagane i Bergen å planlegga i fjor haust.

– Me har i all hovudsak fått med oss folk som er kjent med Johannes sin musikk, seier Natvik.

(Arkivfoto: John Foss)