Samlar Toftøy-folket

VIK: – Me hadde eit vellukka arrangement i Vikavågen i 2002, med kystfisket som tema. Men dette blir første gongen me samlast her i denne forma, seier Asbjørn Toft i Toftøy nærmiljøutval.

Søndag blir det Toftøydag i Vikavågen. Det er venta eit yrande folkeliv på kaien på den sørlegaste øya i Øygarden kommune.

– Det blir ei scene der ulike lokale musikantar skal opptre i til saman ein tre timars tid. Så vert det utstillingar av kunst og andre ting som skal visast og seljast, fortel han.

Knutepunkt
Kaiane i Øygarden var samlingspunkt i gamle dagar, med butikk, rutebåt og fiske. No er det stillare der. Men grendalaget har restaurert det gamle venteskuret, og søndag kjem Vikavågen til å livna til att.

– Veteranbåten Vestgar legg til kai her og skal selja mat. Så får me 7-8 oselvarar hit, som folk kan få seg ein rotur med, seier Toft.

Det finst mange oselvarar i hamner og naust i Øygarden, og han vil gjerne ha kontakt med alle som har ein slik gamal robåt for å få oversikt over kva som finst. Søndag får Toftøy-folket sjå nærare på båtane som tidlegare var heilt sentrale i dagleglivet her ute.

– Me skal og ha utstilling av gamle bilete frå Toftøy i eit naust her, seier han.

Aktivt grendalag
I ein stor lavvo skal nærmiljøutvalet mellom anna få fram litt om det dei driv med, som mellom anna er organiserte turar i det lokale landskapet. Heile Toftøy er samla om arrangementet, men leiaren i nærmiljøutvalet legg spesielt vekt på den innsatsen Vik grendalag legg ned.

– Det er eit svært velfungerande grendalag, og det hadde vore kjekt om alle grendalaga var like aktive som dei, seier Asbjørn Toft.