Røde Kors-ungdom lokkar med Thelma

SUND: Sund Røde Kors Ungdom er det første lokallaget som ser dagens lys her i regionen.

– Vi blei kontakta av Linn Hesvik, nestleiaren i Sund Røde Kors. Ho lurte på om vi hadde lyst til å vera med og starta opp eit ungdomslag, fortel Christine Øvretveit.

Ho er nestleiar i styret, medan venninna Annika Foldnes er styremedlem. Begge bur i Telavåg og går på Sund vidaregåande skule.

Starta opp i haust
Laget starta opp i oktober i fjor, og førebels har dei beskjedne åtte medlemmer i tillegg til fire personar i styret.

– Korleis rekrutterer de medlemmer?

– Det er difor vi er her no, ler Foldnes.

På torsdag arrangerer laget diskotek i ungdomshuset Vågsheim i Skogsvåg. Rusfritt, så klart.

– Vi har fått bandet Thelma til å spela for oss. I tillegg skal dei selja cd-ar og signera, fortel Øvretveit.

Dei to trur ikkje dei får problem med fulle ungdommar på konserten.

– Folk veit at det er eit rusfritt arrangement, seier Foldnes.

– Det er litt difor vi har det på ein torsdag også, seier Øvretveit.

Hjelper ungdom lokalt
Jentene meiner Røde Kors har mykje spennande  by på.

– Det første eg tenkte då eg blei spurt om å vera med i Røde Kors, var førstehjelp. Eg blei overraska då eg fann ut at det er så mykje meir, seier Øvretveit.

– Kva då, for eksempel?

– Røde Kors er ein humanitær organisasjon som til dømes hjelper prostituerte, informerer om prevensjon og støttar ungdom lokalt, seier ho.
Foldnes har vore på ungdomsskulen og presentert lokallaget i dei fleste klassane der.

– Men eg følte at eg ikkje nådde heilt fram, smiler ho.

Treng fast lokale
Dei to understrekar at ein ikkje treng vera frå Sund for å bli medlem.

– Er ein mellom 13 og 30 år, er ein velkommen hos oss, understrekar dei to.

Ungdomslaget er no på jakt etter eit fast lokale.

– Ungdom treng andre tilbod enn fotball. Vi ønskjer å skapa ein treffplass for ungdom lokalt, der ein kan preika, spela biljard, sjå film, kva som helst, seier Øvretveit.

– Ja, på fotballtrening får i alle fall eg beskjed om at det ikkje er nokon syklubb, smiler Foldnes. Men lokalet må vera sentralt, og då er det berre Skogsskiftet som er aktuelt.

– Det går ikkje ofte bussar til bygdene i Sund, påpeikar Foldnes.

Jentene håpar på fullt hus på torsdag. Kanskje er det også håp om å få nokre nye medlemmer i løpet av kvelden med Thelma.