Rockeklubben opnar med Pogo Pops

GLESNES: Etter ein pause som har vart i fleire år og ein oppstartsprosess som har vore utfordrande, er Sund rockeklubb endeleg klar til å starta opp igjen. Klubben får tilhald i det splitter nye sjøsportsenteret på Glesnes.

– Dette er ekstremt spennande. Ein fryd, seier Ole Rasmus Øvretveit, som det siste året har jobba med å gå rockeklubben i gang igjen.

Komplette øvingsrom
Han gler seg til å visa fram dei nye lokala i andre etasje på sjøsportsenteret på Glesnes. Sjøsportsenteret er eigd av Glesnes ungdomslag og speidargruppa, og meininga har heilt sidan planlegginga av bygget vore at det skulle føregå musikkaktivitetar i andre etasje.

– Det er flott for rockeklubben at vi får bruka dei lokala. Eg trur miljøet på Glesnes og rockeklubben vil få stor nytte av kvarandre, seier Øvretveit.

I andre etasje på senteret byr rockeklubben på to komplette øvingsrom med trommesett, forsterkarar og sanganlegg. I tillegg har klubben tilgang på eit forsamlingsrom i etasjen. Ungdom som ikkje sjølv har instrument, kan få låna bass og gitar hos klubben.

Øvretveit håpar så mange spelelystne ungdommar som mogleg vil melda seg inn i klubben.

Pogo Pops lette å be
Når rockeklubben endeleg opnar, blir det markert på skikkeleg vis. På scenen på fredag står dei lokale banda Downfall og Stumbleboy. Men det største namnet på plakaten er Pogo Pops.

– Dei har tilknyting til Glesvær og var ikkje vanskelege å be, seier Øvretveit. Trommis Nicolai Hamre i Pogo Pops bur sjølv berre eit steinkast unna sjøsportsenteret.

– Pogo Pops var den rette gjengen å invitera til opninga, meiner Øvretveit.

Han meiner det skal vera plass til eit par hundre menneske på opninga. Sjølv om det rusfrie arrangementet berre kostar femtilappen for dei under 18 år, er han ikkje uroleg for at det skal dukka opp for mange folk.

– Nei, blir det fullt, så blir det fullt, seier Øvretveit.

Buss heim igjen
Arrangementet startar klokka sju om kvelden, og klokka elleve er det sett opp buss som først går til Telavåg, deretter til Straume. Bussen korresponderer med buss som går rundt Sund kommune frå Skogsskiftet.

Det vil om kort tid bli etablert eit interimstyre for Sund rockeklubb.

– Vi må få på plass medlemsmassen først, slik at medlemmene sjølve kan velja eit styre. Så i haust vil nok arbeidsgruppa som har jobba med oppstarten av klubben, også vera med på planlegging av aktivitetar, seier Ole Rasmus Øvretveit.