Rekordmange påmeldte til kulturmønstring

FJELL: Fjell, Sund, Øygarden og Askøy kommunar har dei siste åra samarbeidd om UKM, og i år blir mønstringa arrangert i kultursalen på Fjell rådhus.

– Vi har annonsert både i avisene og på plakatar at mønstringa startar klokka 14.00 på laurdag, men vi har fått så mange påmeldte at vi må starta to timar før, seier Hilde Kristin Egeland ved kulturkontoret i Sund kommune.

Nesten 200 ungdommar
Ho fortel at mønstringa i vest blir den desidert største i Hordaland i år, trass i at også mange andre kommunar arrangerer mønstringa i samarbeid med kvarandre.

– Og det er god geografisk spreiing mellom kommunane. Det er fint, det viser mangfald, meiner Egeland.

Førstkomande laurdag deltar over 190 ungdommar frå dei fire kommunane med kulturinnslag i ulike klassar.

– Aller flest påmeldte er det i kategorien klassisk, vise og pop, opplyser Egeland. Dei andre kategoriane på scenen er musikal, teater og dans, og rock, som blir presentert i eiga avdeling om kvelden. Heile dagen kan ein også sjå arbeida til dei påmeldte innan kunst.

Dobling på to år
For to år sidan var det 87 deltakarar fordelt på 40 innslag med i UKM, i fjor var talet på 108 deltakarar og 55 innslag. Årets 191 ungdommar fordelt på 83 innslag er dermed meir enn dobbelt så mange som for to år sidan.

– Kva er årsaka til auken?

– Det eine er nok at vi utsette fristen for påmelding, sidan vi veit at mange oppdagar det i siste liten og får lyst til å vera med, seier Egeland. Fristen for påmelding gjekk eigentleg ut i desember, men blei utsett til midten av januar.

– Det andre er at vi har sendt ut invitasjon til alle i kulturskuledatabasen, inkludert dei som står på venteliste for plass i kulturskulen, seier Egeland.

Stolt trass utfordring
Den siste veka har arrangørane hatt ein jobb å gjera med å opplysa deltakarar, frivillige og dei som skal jobba på arrangementet, om endra starttidspunkt.

– Vi håpar at endra startidspunkt ikkje skapar problem for publikum eller deltakarar, seier Egeland. Trass i nokre praktiske utfordringar er ho glad for den store interessa for Ungdommens kulturmønstring.

– Vi er stolte over å vera den største lokalmønstringa i Hordaland, seier Hilde Kristin Egeland.