Open kveld med paintball

VÅGE: Då arrangerer Grenda paintballklubb open kveld i samarbeid med Ungdommens kommunestyre. Målet er å gje ungdom høve til å prøva paintball i trygge rammer.

– Det er eit rusfritt arrangement, og det vil vera politi tilstades, seier Christian Foldnes i Grenda paintballklubb.

Paintball har ein noko dårleg klang hjå enkelte, etter ein del hendingar andre stader.

– Me har god tryggleik her, og håpar å kunna bidra til å gje det eit betre rykte, seier han.

Paintball er ein måte å leika krig på, der to lag kjempar mot kvarandre på eit avgrensa område. Ein brukar våpen som skyt ut små plastkuler med fargestoff. Med verneutstyr som briller og hjelm er det heilt ufarleg.

– Ein får eit skikkeleg adrenalinkick av å spela, og det er sosialt og kjekt, seier Foldnes.

Dei som skal vera med i Våge i morgon må vera minst 13 år gamle. Dei som er under 18 må ha med seg mobilnummeret til foreldra sine. Arrangementet varar utover kvelden, og det vert rigga opp lys og musikk på området.