Milliongåve vert ny Telavåg-utstilling

TELAVÅG: Det er fem år sidan Mette Mohn ringte til Jenny Heggvik hjå Nordsjøfartmuseet og spurte om dei trengte midlar til utstillingar.

Den storslåtte gåva frå Mohn-familien har no fått historiske bein å gå på.

I februar/mars opnar museet på Telavåg ny hovudutstilling.

Vestnytt har fått snika rundt i dei nye utstillingslokala.

Folk kan berre gle seg.

«Det nære rommet»
Den nye utstillinga består av fleire delar. Film om Telavåg ligg i botn av heile utstillinga. Den anbefalar museet sine tilsette at ein får med seg fyrst.

– Den gjev grunnlag for resten av utstillinga. Har ein sett den, så kan ein fordjupa seg i resten, seier Geir Olav Sebjørnsen, som har ansvaret for bygginga av den nye hovudutstillinga.

Så kan ein gå inn i «det nære rommet».

– Me tar for oss Telavåg-historia frå A til Å, seier ein stolt Sebjørnsen.

I det nære rommet kjem ein tett på enkeltskjebnane i krigshistoria til Telavåg.

– Den tidlegare utstillinga var meir generell. Denne vert meir personifisert. Me tek føre oss enkeltpersonar si historie i mykje større grad, seier Sebjørnsen.

Gjenreisinga og båt
I tillegg tek utstillinga føre seg gjenreising og mange farlege båtturar over Nordsjøen.

– Me har planar om å laga eit båthus, der folk kan gå inn og oppleva korleis det kunne vera på havet den tida, fortel Sebjørnsen.

I tillegg til den nye utstillinga får den museumsinteresserte sjansen til eit djupdykk i Telavåg-historia.

– Me har laga eit interaktivt bibliotek. Der kan liten som stor gå djupare inn i historia enn det me klarar å stilla ut, seier Sebjørnsen.

Milliongåva
Jenny Heggvik har hatt sitt vyrkje på Nordsjøfartmuseet sidan 1999. Ho hugsar godt samtalen då ho fekk ein telefon frå Mette Mohn i november.

– Dette er ei gåve som har stått og venta sidan 2005. No var det på tide med ei ny utstilling, og då er me så heldige at me har hatt pengar på bok, seier Heggvik.

Ho er svært glad for at pengegåva no vert utstilling.

– Far til Trond Mohn, Frank Mohn, hadde stor interesse for nordsjøfarten under krigen. Han reiste sjølv og tok med seg familien til Buckie i Skottland. Der oppheldt han og familien seg. Trond og hans avlidne kone Mette var fleire gonger på tur til museet her, seier Heggvik.

Stengt gjennom vinteren
Nordsjøfartmuseet har alltid hatt ope heile året. Kvar sundag har publikum hatt sjansen til å koma til Telavåg og vitja museet, utanom sesongen. Dette vert ikkje mogleg i vinter.

– På grunn av ombygginga i høve den nye utstillinga, så vert me stengt frå 15. oktober til utstillinga opnar i februar/mars. Me vil ha eit såpass redusert tilbod, at det ikkje var hensiktsmessig å halda ope, seier Jenny Heggvik.

I tillegg til alt det andre som skjer på Nordsjøfartmuseet, så kjem museet og Egil Christophersen ut med ein ny katalog når utstillinga opnar neste år.

– Katalogen tar opp historia til Telavåg og Lidice i Tjekkia. Dei har svært lik skjebne under andre verdskrig. Dette har Christophersen tatt for seg, seier Jenny Heggvik.

– Hyggelig
Trond Mohn har sjølv vore fleire gonger på Nordsjøfartmuseet. Han tykkjer det er svært hyggelig at museet no får ei ny hovudutstilling med hjelp frå Mette Mohn si gåve.

– Det er veldig hyggelig. Eg tykkjer dette er ei svært viktig del av krigshistoria, seier Trond Mohn.

Sjølv var han fødd i Skottland.

– Eg har vore på museet, og vil koma og sjå den nye utstillinga når den er klar, seier Trond Mohn.