Lokkar framtidige rockestjerner

SUND: I samarbeid med AKKS Bergen arrangerer Sund kommune for første gang rockekurs for ungdom mellom 13 og 18 år.

– Eg er veldig spent. Eg håpar det blir stor interesse for dette, smiler kulturkoordinator Hilde Kristin Egeland.

Både jenter og gutar

AKKS står for Aktive Kvinners Kultursenter og er ein frivillig organisasjon som jobbar for å få rekruttera, motivera og synleggjera kvinner i musikkbransjen. Men sjølvsagt kan også gutar melda seg på kursa.

Andre veka i februar startar det opp rockekurs i Sund der ein kan velja mellom grunnkurs i vokal, gitar, el-bass og trommer. Første del av kurset varar i åtte veker, og lærarane kjem frå AKKS.

– Deretter startar vi med samspelkurs, der vi dannar band av deltakarane, forklarar Egeland. Denne delen går over fem veker.

– Til slutt får banda opptre på ein stor konsert på Garage i Bergen, saman med band som har gått på kurs i Bergen, fortel kulturkoordinatoren. Trommesett, sanganlegg med mikrofonar og forsterkarar til bass og gitar er tilgjengeleg på kursplassen. Har ein ikkje sjølv instrument, er bass og gitar mogleg å leiga.

AKKS har arrangert slike kurs i Bergen i mange år, men dei har aldri før blitt arrangert i Sund.

Prioriterer Sund-ungdom

Kursa vil bli haldne på kurssenteret i Skogsskiftet. Det er plass til fem deltakarar på kursa i vokal, bass og gitar, og tre deltakarar på trommekurset.

– Vi opnar for påmelding no, så det kan vera lurt å vera raskt ute om ein vil sikra seg plass, seier Egeland. Samtidig trengs det fire deltakarar på kvart kurs for at det skal bli noko av.

– Vi prioriterer ungdom frå Sund. Men dersom det er ledig plass, kan vi ta inn deltakarar frå Fjell også, så det er berre å ta kontakt, seier Egeland.

Spelar sjølv i band

Ho meiner Sund har ein god del å gå på innan dette feltet.

– Det har ikkje vore satsa så mykje på denne typen aktivitetar i Sund. Desse kursa er ein del av ei større satsing på barn og unge. Det er eit ønske som er signalisert frå politikarane, seier Egeland. 

Ho deltok sjølv på eit AKKS-kurs for sju-åtte år sidan. Sidan då har ho spelt bass i band.

– Når ein først har begynt i band, blir ein gjerne biten av basillen, meiner Egeland. Håpet er difor at rockekurset kan gi grobotn for band til Sund rockeklubb, som er planlagt starta opp på nytt.

– Dersom det er stor interesse for kursa, kan det henda at dei blir vidareført, seier Hilde Kristin Egeland.