Lagar filmklubb for eit breidt publikum

OEN: Det er ikkje lenge sidan Ovågen filmklubb vart stifta. Ein gjeng frå Kystmuseet er initiativtakarane, og hovudsetet blir på museet.

– Me har ein flott sal her, som er perfekt til filmar, seier Elisabeth Rustad.

For heile kommunen
Det blir ingen ny kino for øygards-bebuarane, men ein klubb der gamle klassikarar vert framsynt.

– Me ynskjer oss ein filmframvisar, ein såkalla millimeter-visar. Men me har ikkje klart å få tak i dette enno, så me køyrer på DVD-filmar, seier ein av initiativtakarane til Vestnytt.
Stiftinga er tilknytta Filmklubb-forbundet.

– Me må gå gjennom dei for å få lov å syna fram filmar offentleg. Gjennom forbundet får me ei liste over filmar me kan syna fram, seier Rustad.

Breitt publikum
Tanken bak Ovågen filmklubb er å skapa eit breitt publikum. I løpet av eit semester skal det vera tilbod som passar for både liten og stor.

– Ideelt ser me mot alle aldersgrupper i Øygarden, sidan kommunen er liten. Me har lyst å inkludera alle, både born og eldre, seier Rustad.

Dei har til dømes ein avtale med Tednebakkane om å syna fram filmar for bebuarane på omsorgssenteret.

Ovågen filmklubb er ein medlemsbasert klubb, og dei som vil sjå film der for ein liten pengesum, må vera medlemmer. Men ikkje-medlemmar kan og sjå film.

– Filmklubben er open for alle, sjølv om det er ein fordel å vera medlem, smiler Rustad.

Det blir ikkje storopning denne våren, eller semesteret som dei kallar filmsesongane sine.

– Me er godt ut i vårsemesteret, og det blir ikkje svært mange filmar framover, men me satsar på neste semester, seier Rustad som har sitt arbeid på Kystmuseet når ho ikkje er student.

Ein visning i mars
Planen er å setta opp ei framsyning i mars, og så startar filmklubben opp for alvor i løpet av juli.

– Me skal ha ein generalprøve i byrjinga av mars. Då får spesielt inviterte koma og sjå korleis dette fungerer, seier Rustad.

– Kva film skal de syna fram?

– Då vert det Lars von Triers film «Riket», smiler ei spent Elisabeth Rustad.

Førebels har dei fronta filmklubben på Facebook, kor dei har 20 medlemmer.

– Eg har fått inntrykk av at dette er noko folk er interessert i. Eg trur i alle høve at det er eit publikum for oss i Øygarden, men det vil nok ta noko tid å bygga opp ein medlemsmasse, medgjer Elisabeth Rustad.