Knallsuksess for Periferifestivalen

GLESVÆR: Helga Golten i Periferifestivalen har ikkje oversikt over kor mange som besøkte festivalen i løpet av helga.

– Men det var uansett mange nok til at vi klarar oss godt. Vi går som sagt og smiler, seier ho.

Stjernegalleri

Begge dagane var godt besøkt, men flest publikummarar fann vegen på laurdag. Etter den stemningsfulle gratisframsyninga av Terje Vigen med Bjarte Hjelmeland ytterst på ein knaus i havgapet, fyrte det unge bandet Kakkmaddafakka opp stemninga med eit hemningslaust publikumsfrieri.

Vidare kom stjerneartistane som perler på ei snor: Stg. Petter, Natalie Nordnes med Andy Nice, som spelte i eit av nausta på kaien, William Hut, Magnet, Morten Abel, Kaptein Kaliber med tingingsverket og til slutt Sondre Lerche.

Lovar meir på Glesvær

Alle som ein av artistane gav uttrykk for at Glesvær er ein svært så passande plass å spela konsert.

– Det var på tide at det vart arrangert ein festival her. Eg håpar det er den første i ei lang rekkje, sa Sondre Lerche, som i går spelte på Glesvær for tredje året på rad.

– Ser dåke om to år, ropte Morten Abel.

Arrangørane har så langt ikkje bestemt seg for kva som skjer vidare.

– Vi veit ikkje om det blir festival til neste år, eller om det blir annakvart år. Og kanskje blir det noko anna enn ein festival. Men noko blir det her på Glesvær, lovar Helga Golten.

Les meir om Periferifestivalen i papirutgåva

Sjå også bildeseriar