Illustrerer til Staalesen

HELLESØY: Fredag kom stykket ut i bokform.

– Det har vore ei oppleving å illustrera til denne boka, seier illustratør og multikunstnar Roger Johnsen.

Vaskerelvens rose
I går møtte han pressa saman med forfattar Gunnar Staalesen, Jo Gjerstad frå Bodoni Hus og ein drøss medarbeidarar på Den Nationale Scene (DNS) i Bergen.

– Hm, så det er du som har lokka Vestnytt hit, seier Gunnar Staalesen når fotografen vil ha Johnsen fremst på bildet.

«Begrav meg i Bergen» er ei frittståande fortsetting av komediesuksessen «Vaskerelvens Rose» som gjekk for fulle hus på DNS i 1986 og -87.

Det nye stykket har premiere neste laurdag, men alt no kjem altså komedien ut i bokform.

– Eg har jobba mykje med Jo Gjerstad i Bodoni Hus dei siste 6 - 7 åra. Det var han som spurte om eg ville illustrera til denne boka, fortel Johnsen.

Stort spenn
Han las stykket opp og ned før han byrja på teikningane tidleg på sommaren i år.

– Skissene leverte eg før eg reiste på ferie. Då eg kom heim, møtte eg Staalesen. Alt gjekk i boks, smiler Johnsen.

Johnsen har eit langt liv i reklamebransjen både i Stavanger og Bergen bak seg. For sju år sidan starta han som frilansar.

Han har eit breitt spekter som illustratør. Johnsen leverer alt frå gåver til folk som har runde dagar til prospektillustrasjonar som viser korleis eit framtidig bygg eller byggjefelt vil sjå ut i terrenget.

– No for tida jobbar eg mykje med illustrasjonar til tryggleiksmateriell, fortel Johnsen.

Underhaldande jobb
– Arbeidet med «Begrav meg i Bergen» har vore veldig kjekt og annleis. Når ein driv med prospekt, sit ein ikkje akkurat og ler, for å seia det slik.

Johnsen meiner folk har noko å sjå fram til.

– Det er ei artig bok, smiler han.

I stykket vender Vaskerelvens rose, Diana, tilbake til Bergen saman med fokledningskunstnaren Hahnegal. Dei har vore i åtte års ufrivillig eksil og kjem tilbake til byen for å hemna seg på dei som sendte dei bort, familiane Krohn og Frimann. Det er duka for forviklingar.

(Foto: Kai Svellingen Flatekvål)