Hege Turøy gir ut juleplate

I fjor arrangerte Hege Turøy frå Ågotnes i Fjell ei rekkje julekonsertar saman med vokalist Roy Vorland.

– Eg presenterte ein ny julesang på ein av konsertane, og fekk veldig gode tilbakemeldingar, fortel Hege Turøy.

Syng på norsk

Ho bestemte seg difor for i alle fall å spela inn den sangen.

– Så kom det til ytterlegare fem sangar i løpet av juleturneen, fortel ho. Turøy har skrive alle sangane sjølv. Éin av dei er spelt inn i studioet til trommis Jan Tore Ness, resten er spelt inn hos Kato Ådland.

Albumet består av låtane Julestemning, Vinternatt, Engel, Jul hos oss og Desember.

– Eg syng på norsk. Det var ikkje mogleg å formidla denne stemninga på engelsk, meiner Turøy.

Går i minus

Ho har fått støtte av faren til deler av albumet, men mesteparten står ho for sjølv. Totalkostnaden på prosjektet er på nærare 150.000 kroner.

– Eg har ikkje noko støtteapparat i form av plateselskap, eg gjer alt sjølv, seier Turøy.

Plata blir distribuert gjennom butikkar på Ågotnes og truleg på bensinstasjonar her i regionen.

– Eg har trykt opp 500 eksemplar, opplyser Turøy. Det betyr at ho uansett ikkje går i pluss.

– Eg har så utruleg lyst til å få gitt ut musikk. Så håpar eg at dette lønnar seg på lang sikt. Håpet er å kunna driva med musikk utan å gå i minus, smiler Turøy.

Tekstane i fokus

På juleplata har ho prøvd å halda ein jordnær og nedtona stil.

– Vi har ikkje kjørt på med jingle bells og denslags. Tekstane står i fokus, seier Turøy.

Til sangen Vinternatt har ho spelt inn musikkvideo for første gong.

– Ja, dette er den første profesjonelle musikkvideoen eg har laga. Den blir sendt til Svisj og Norsk på norsk og lagt ut på Myspace og Youtube, fortel Turøy.

No ser ho fram til to julekonsertar saman med bandet, som består av trommis Jan Tore Ness, Kristian Wedberg på keaboard, Sveinung Medbøen på gitar og Lars Sveinung Lid på bass. 6. desember spelar dei i Landro kyrkje, 10. desember går turen til Sund kyrkje.