Glesvær, vi elskar dokkar!

GLESVÆR: Periferifestivalen opna med Finn Erix i idyllisk skjærgardssol, medan Pogo Pops strålte gjennom regnveret seinare på kvelden.

– Vi er slett ikkje sure. Men er det så jævla vanskeleg å skriva alle artistane med like store bokstavar?

Finn Tokvam i Finn Erix held opp festivalplakaten.

– Ja, sjå der. Pogo Pops med store bokstavar. La oss sjå... ja, der står det med lita skrift, Finn Erix. Hm.

– Men vi er ikkje sure, seier makker Halvor Folgerø.

– Nei, vi har ikkje tenkt på det ein gong, understrekar Finn Tokvam.

Hyllest og harsellas
Finn Erix hadde med seg Frode Grytten, og saman hadde dei eit repertoir med hyllest og harsellas til strilane.

– Vi er komne for å orsaka. Vi hadde ingenting med å uttala oss om korleis strilane dansar, sa Finn Tokvam. «Storavisa» Vestnytt fekk dermed sitt for å ha asa seg opp over Finn Erix for to år sidan.

Utover kvelden gleda publikum seg over garasjerock med Team Blitzkrieg som vart avløyst av HP Gundersen And His Patient Orchestra.

Fekk varmen med Pogo
Etterkvart som sola forsvann og temperaturen dalte, fekk publikum likevel opp varmen og våga seg stadig nærare scenekanten. Då Pogo Pops kom på scenen klokka elleve, var Glesvær definitivt sentrum i periferien.

– Pogo, Pogo, Pogo! messa forsamlinga gjennom øl- og sigarettlukt. Og Pogo Pops lot seg ikkje be to gonger.

– Glesvær, vi elskar dokkar, konstaterte vokalist Frank Hammersland.

Kvelden fekk ei rett surrealistisk avslutning med Ro-inn-kino i sidelengs regnver. Vi ser fram til ny fest i kveld med blant andre William Hut, Morten Abel og Sondre Lerche.

Sjå også bildeserie