Endeleg mønstring i Sund

SUND: I 2003 arrangerte Fjell, Sund og Øygarden for første gang Ungdommens kulturmønstring i fellesskap. Etterkvart har også Askøy kommune blitt med på laget. Sidan den tid har arrangementet gått på omgang i kommunane.

På Sund vidaregåande
– Sund har av ulike grunnar sluppe å arrangera fellesmønstring dei siste åra, seier kulturkoordinator Hilde Kristin Egeland i Sund. Blant anna har kommunen hatt stor utskifting i kulturkoordinatorstillinga.

Men førstkomande laurdag er det på nytt duka for mønstring sør på Sotra.

– Vi held arrangementet på den vidaregåande skulen, fortel Egeland.

På fredag skal ein heil gjeng i sving for å klargjera kantina på skulen til kulturmønstring.

– Bygg- og anleggslinja ved skulen byggjer ein vegg der kunsten skal hengast opp. Dei lagar også ein skiljevegg for oss, fortel Egeland. Elevar på scenografi og kostyme har ansvar for å dekorera scenen.

– Det er fint at skulen også blir engasjert i arrangementet, meiner Egeland.

Stadig færre deltakarar
100 ungdommar fordelt på 40 innslag er påmeldte til årets mønstring. Det er tre kategoriar i mønstringa, som startar klokka to på ettermiddagen med klassisk, pop, vise, dans og beatbox. Deretter kjem dei som deltek i kategorien utstilling og film/video.

– Til slutt blir det rock, fortel Egeland.

Det som er sikkert, er at deltakartalet stadig går nedover her i regionen. I 2002 var det til samanlikning over 60 deltakarar berre i Sund kommune.

– Det er bekymringsverdig, meiner kulturleiar Bernt Hjørnevik i Øygarden. Han har vore med og arrangert UKM i over ti år.

– Vi har det på agendaen, for her har vi ein jobb å gjera, seier Hjørnevik. For på landsbasis går deltakartala jamt oppover.

– Vi burde nok vore meir aktive opp mot kulturskulen, for dei saknar ofte ein arena der dei får vist seg fram. Vi må knekka koden, seier Bernt Hjørnevik.