Eit fotografisk glimt av ei ekte fiskarsjel

GLESVÆR: Periferifestivalen har etablert seg som ein svært populær festival her i vest. Kvart år presenterer Helga Golten og dei andre eldsjelene frå festivalen ein utstillar.

Denne gongen er det ultralokale bilete av fiskaren og pensjonisten Torvald Andreassen (80)

Naust i naustet
Poul Toft Iversen byrja fotografera den røynde fiskaren Torvald i fjor haust. Sidan då har han festa Sund-sokningen på fleire aluminiumsplater, som no skal stillast ut under Periferifestivalen. Både på kafeen og i eitt av nausta på Glesvær blir dei fantastiske bileta til danske Poul stilt ut.

Sjølv er fotoobjektet nøktern men nøgd.

Poul Toft Iversen vart bergtatt av Torvald første gongen han fotograferte han.

– Det er noko med augene hans. Torvald har ei særs god utstråling, seier Poul Toft Iversen.

Utstillinga er tredelt. Fotografen fortel historia om Torvald ute på fiske, i naustet og heime.

– Korleis har da vore å vera fotomodell over så lang tid?

– Da har vore bra. Eg har ikkje merka så mykje av han, smiler Torvald.

Poul legg til at berre eitt bilete er oppstilt. Resten av dei er situasjonsbilete.

– Torvald er fantastisk. Han er den fødte modell. Torvald forstå situasjonen når eg byrjer å fotografera, og då let han meg gjera meg ferdig, smiler Poul Toft Iversen.

Kjenner seg att
Torvald kjenner seg att i bileta som no heng på Glesvær.

– Ja, dei såg bra ut, fortel Torvald som såg bileta for første gongen berre for nokre dagar sidan.

– Men det er litt spesielt å verta hengt på veggen, smiler han lurt.

Fotografen er svært takksam for den moglegheita han har fått med å følga Torvald Andreassen.

– Det har vore stort, seier Poul Toft Iversen.