Ein engel i Telavåg

Som eit symbol på konserten gjekk sola sakte ned i horisonten medan Silje Nergaard sang seg rett inn i hjarta til både publikum og Vestnytt.

Bak i salen sat Rolf Øvretveit, eldsjel og konsertpromotor, og kikka på den siste konserten av dette slaget.

 Han tok Silje og resten av gruppa hennar på tur på Sotra nokre timar før konserten. Den kjente sangaren fekk oppleva Fjell festning og andre sjåverdigheiter før dei vart servert lokal og kortreist mat av arrangørane.

Ramma kunne ikkje vorte betre. Lyset utanfrå spegla seg i vindauga medan Silje Nergaard prestenterte, som ho sjølv sa det, «best of meg».

– Det er ganske spesielt at eg skal avslutta ein slik festival, seier Silje Nergaard.

Ein fullsatt sal ytra ikkje ein lyd. Med to gitarar og si eiga stemme, regjerte ho Telavåg sin store konsertsal.

– Det er fantastisk å arrangera konsertar her. Eg voner at andre vil gjera det. Eg skal hjelpa til, men eg kan ikkje lenger ta det økonomiske ansvaret, seier Rolf Øvretveit.

 Han er litt glad og mest vemodig når siste konserten skal til å byrja.

– Så lenge me kan gå på gode konsertar i framtida her i regionen, så er det ikkje veldig trist at me legg ned Vestkystfestivalen, seier Øvretveit.

Men han medgjer at det er litt vemodig.

– Eg tykkjer det er kjempekult at Silje skal avslutta det heile. Det vert på ein måte ei verdig avslutning, seier Rolf Øvretveit.

 Han har køyrt rundt på stjernene heile dagen, og dei kan melda attende at dei er nøgde med både mat og drikke.

– Den svenske plateprodusenten Pål Svenre er her for å høyra på Silje. Dette er ein manager som har produsert plater til Peter Jöback, seier Rolf Øvretveit.

Etter konserten sa Rolfen til Silje det han ikkje turde å seia på scenen.

– Eg sa at det kun var ein feil med Silje…

– Ka då?

– At ho er gift, gliser Rolf Øvretveit.

– Ka svarte ho?

– Åh…han er så søt, ler Rolfen skjelmsk.

Han legg til at dette var ein av dei beste konsertane han har vore på av Silje Nergaard.

Gitaristane Haavard Bendiksen og Halgrim Bartber var karane som saman med Silje Nergaard gav dei oppmøtte ein fantastisk sundagskveld.