Bigbang kjem til Periferien

GLESNES/BERGEN: Onsdag presenterte Periferifestivalen programmet for årets festival, som går av stabelen i slutten av august.

The September When

Gjenforente The September When er blant banda som entrar scena på Glesnes i sommar. Bandet fekk ein ny renessanse med det høgst uventa albumet, Judas Kiss.

Nysleppt plate kan Nathalie Nordnes også skilte med. Ho har gjesta Glesnes og festivalen tidlegare, men ville spele igjen i år.

– Eg syntest det var veldig gøy å spele på festivalen den fyrste gongen. Difor vil eg gjerne bidra i år også. I tillegg har eg eit spesielt forhold til Glesnes, sa Nordnes under programsleppet i går. På spørsmål om kva ho synest om programmet, lyder svaret: – Eg trur det blir latterleg bra!

Bigbang toppar plakaten

Trioen Bigbang er i desse dagar eit av dei mest populære banda i Noreg. Dei gav nyleg ut sitt åttande studioalbum, Edendale, og dei har ei lang festivalliste framfor seg i sommar. Periferi-programmet prydast også av andre store artistnamn, deriblant jazzbandet The Farmers Market, Odd Nordstoga og popgruppa Katzenjammer. Dei fire jentene i Katzenjammer er dessutan Roskilde-aktuelle. Bandet skal underhalde Glesnes fredagskvelden under festivalen.

Trekkspelaften

Jentene i Katzenjammer gav ut albumet Le pop i 2008 og har deretter turnert i både USA og England.

Programmet og temaet for fredagskvelden vart ifølge Jørgen Thue til meir eller mindre tilfeldig. Det vart bestemt at alle band som spelar fredagskvelden, måtte ha trekkspel i sin instrumentstall. The Farmers Market har både trekkspel og ei lang turneliste bak seg.  Dei har blant anna spelt på Moldejazz etter at dei gav ut albumet Surfin’ USSR i fjor.

Gjengangarar

– På programmet har vi tre artistar som spelar for andre gong, Nathalie Nordnes, Real Ones og Pogo Pops. Dei er booka igjen, fordi vi ynskjer dei tilbake. I tillegg er desse artistane aktuelle for festivalen fordi dei er klare med nytt materiale, forklarar Thue.

– Vi har sett saman programmet med omsyn til at det skal vere god musikk, og stilarten varierer frå metal til folkepop, seier Thue.

Tidlegare har Periferifestivalen avslørt at banda Real Ones og Pogo Pops kjem. Å kunne skilte med desse banda, er ifølgje Thue eit bevis på at festivalen er god.

– Om ikkje artistane kunne tenkje seg å spele her, ville vi heller ikkje fått dei, seier han.

Vil ikkje veksa

Festivalprogrammet for i år er litt dyrare enn i fjor, men ut frå eit tilsvarandre høgare budsjett. Likevel hevdar arrangørane at dei ikkje har ambisjonar om å bli større enn det dei er.

– Målet er å gjere periferien, Glesvær, til eit senter for kultur, og det fyrste spadetaket vert teke to dagar i slutten av august, fortel Thue.

Festivaldiktar Frode Grytten skal sparke i gong festivalen allereie onsdag 26. august og inviterar til Beatpoesi på Glesnes. Fredagen startar med improvisasjon på Bymannsberget, der blant andre Tormod Løvold og Bård Ylvisaker opptrer.