Avslutta rockekurs med Garage-konsert

SUND/BERGEN: Det er i samarbeid med Akks Bergen at kulturkontoret i Sund for første gang har arrangert rockekurs for ungdom i vår.

– Vi er kjempenøgde. Eg har inntrykk av at ungdommane har hatt det gøy, seier kulturkoordinator Hilde Kristin Egeland.

Gøy på Garage
Trommekurset var det ingen som meldte seg på, dermed blei det arrangert instrumentalkurs i vokal, bass og gitar. Desse kursa gjekk over åtte veker, før deltakarane blei sett saman i band. På dei etterfølgjande samspelkursa kom det fleire deltakarar til.

– Rune Piraten Solberg har vore lærar i vokal, bass, gitar og alle samspelgruppene. Vi er svært nøgde med han, seier Egeland.

Thea Ekerhovd har gått både på vokalkurs og samspelkurs. Frå før syng ho i kulturskulen, så det er ikkje første gangen ho har sunge for folk.

– Det var kjempegøy å spela på Garage. Eg har sunge med piano, gitar og fiolin før, men aldri med band. Det er litt vanskelig, ein må synga så høgt, fortel Thea.

Blir fleire kurs
Ho synest ho har lært mykje på kurset.

– Blant anna korleis ein skal synga i mikrofon, fortel ho. På Garage spelte ho i det samansette bandet som tok namnet Noise of Sund, saman med Emil Bjånes på trommer, Severin Hjelle Nygård på gitar, Marius Fonnes Myren på bass, og Egzona Krasmiqi på vokal. Dei framførte blant anna låten «I love rock ’n’ roll».

Hilde Kristin Egeland lovar at dei blir fleire rockekurs framover.

– Når Sund rockeklubb startar, blir det kurs i ei eller anna form i regi av klubben, gjerne i samarbeid med kulturkontoret, seier Egeland.

Prøva noko nytt
Stian Viksøy Nøkleby har også gått både på vokal- og samspelkurs.

– Eg spelar piano på kulturskulen, men dette er første gongen eg har prøvd meg på vokal, smiler han. Han har ofte fått høyra at han har god sangstemme, og ville prøva noko nytt.

– Det var gøy. Eg lærte mykje sangteknisk, seier han. Før konserten på Garage var han berre ørlite nervøs.

– Eg er blitt vant til å opptre, så det er aller mest gøy på scenen, fortel han.

Stian sang med bandet Screw-driver (biletet), saman med Christian Evensen og Torstein Viksøy på bass, Toni Skjerven på trommer og Andreas Vik Nilsen og Niklas Dyrdal på gitar.

– Vi spelte «Get it on» av Turboneger og «Paranoid» av Black Sabbath. Stemninga var god, meiner Stian.

Heile 22 band spelte under vårens samspelkonsert i regi av Akks Bergen på Garage laurdag. Det tredje og siste bandet frå Sund bestod av Vegard Vardøy på gitar og vokal, Henrik Arnesen Johnsson på gitar og Roar Førde på bass.