– Men kva med punkt tre? spør Beate Husa (KrF) hektisk når avstemminga om dei nye SFO-vedtektene i kommunen er overstått.

– Det fekk du jo nettopp gjennomslag for, er svaret over bordet frå Høgre-benken, og Husa vender tommelen opp med eit glis.

Utvidar opningstida

Forslag til nye SFO-vedtekter har lege ute til høyring i vår, og Beate Husa er av dei som meiner kommunen bør ha større visjonar for kva SFO-tilbodet bør innehalda.

– Vi har ein barnehageplan på 32 sider, og SFO-vedtekter på to-tre sider. Det seier noko om korleis vi ser på SFO, som lenge har vore eit stebarn i politikken, sa Husa til Vestnytt i april.

Denne veka fekk ho gjennomslag for at det skal utarbeidast ein felles plan for skulefritidsordninga ved skulane i Sund. I si innstilling hadde administrasjonen lagt opp til at det skulle veljast ei eiga arbeidsgruppe som skulle laga denne planen.

– Eg meiner saksgruppe for levekår og nærmiljø bør få ansvaret for planen, så kan saksgruppa invitera inn aktuelle samarbeidaktørar. Dette må skje i samarbeid med skule og brukarane, sa Husa frå talarstolen på tysdag. Dette fekk ho fleirtalet med seg på.

I dei nye vedtektene blir det opna for at SFO der det er behov for det, kan opna klokka sju om morgonen i staden for klokka halv åtte, utan at prisen blir auka. Vedtektene trer i kraft 1. august.

Halv plass kan bli billigare

Når Husa blei så glad for at det tidlegare omtalte punkt tre blei vedteke, er det fordi ho i det punktet føreslo å gi rådmannen i oppdrag å få fram konsekvensane ved å samkjøra søskenmoderasjon på barnehage og SFO, og dessutan sjå nærare på prisen for halv plass. Husa er ikkje nøgd med at halv plass ved SFO kostar 1635 kroner når heil plass kostar 1985 kroner.

– Det virkar som om vi ikkje vil at folk skal velja halv plass, og eg mistenkjer at det er fordi det er lettare å organisera heile plassar, sa Husa.

Når det gjeld søskenmoderasjon, får ein i dag lågare pris for barn nummer to i barnehagen, men ingen moderasjon når det eine barnet går i SFO og det andre i barnehagen. Dette ønskjer Husa å endra på. Men når prisen går ned for foreldra, går det naturleg nok ut over kommuneøkonomien.

– Vi må sjå på dei økonomiske sidene i samband med budsjettbehandlinga i haust, seier Beate Husa.