GLESNES: Eitt av kriteria for å få spela på Periferifscenen i går, var at trekkspelet var inkludert.

– Puh, sukkar lokal trekkspelentusiast Simon Kalgraff strålande og ørlite misunneleg etter at Polkabjørn og Kleineheine har avslutta si avdeling. Men det skulle bli meir å glisa av utover kvelden.

Bruce Springsteen frå Odda

Regnet regelrett bøtta ned på austsida av Kolltveittunnelen ein halvtimes tid før Periferifestivalen starta i går. Men bortsett frå ei byge heilt i starten av kvelden, slapp publikum og artistar unna det aller verste vestlandsveret på Glesnes i går.

Festivaldiktar Frode Grytten og Sund trekkspelklubb fekk æra av å opna festivalen. Sistnemnte framførte Bruce Springsteen-låten «Thunder Road», arrangert for anledningen av Odd Nordstoga.

– Bruce Springsteen er frå Odda, fortalte Frode Grytten.

Seinka skuldrene

Deretter følgde Oddvar Torsheim med Birger Meland, Polkabjørn og Kleineheine, Katzenjammer, Farmers Market og Odd Nordstoga.

– Det er fleire folk her i år enn i fjor, smiler pressesjef Helga Golten og kikkar rundt seg.

I år har ho for første gang klart å seinka skuldrene.

– Dei to føregåande blei det mest springing frå det eine til det andre, fortel ho.

– Det er så herleg å snu seg bakover og sjå på publikum. Folk kosar seg, konstaterer ho nøgd.

Godt billettsal

På gratisarrangementet for dei under 18 år på dagtid i dag, er det duka for bok og improvisasjon i naustet, Frode Grytten, Nathalie Nordnes, Storm Weather Shanty Choir og Krakow. Seinare i kveld er det blant andre Pogo Pops, The September When og BigBang som skapar festivalstemning på Glesnes.

– Det blir nok våtare enn i går, trur Helga Golten. Men lite tydar på at publikum held seg heime av den grunn. Alt torsdag gjekk det ut melding om at laurdagen nærma seg utselt.

Sjå bildeserie