Om kommunestyret gjer som skulegruppa vil, så går Tofterøy skule over i historiebøkene om berre få dagar. Når elevane går ut etter siste skuledag før sommarferien, er det også siste skuledag for Tofterøy som skule.

Rektor Leif Audun Hammersland tykkjer det vert rart.

Skulemannen

Hammersland har vore både elev, lærar og rektor på Tofterøy skule. Sidan 1959 har Leif Audun Hammersland på eit eller anna nivå vore tilknytt skulen.

– Eg byrja på skulen i 1959. I 1971 var eg lærar på skulen, før eg byrja som nyutdanna fast lærar på skulen i 1979, fortel Hammersland.

Frå 1982 til 1990 var han lærar på skulen før han flytta tenestene sine andre stader. I 1990 var han attende som lærar før han i 2000 vart vikarierande rektor på Tofterøy skule. Etter ti år som rektor på Telavåg skule, kom Leif Audun Hammersland attende som rektor på Tofterøy i 2010.

– Korleis vert det å lukka dørene for godt på Tofterøy skule?

– Det er klart det vert svært spesielt på mange måter, seier Leif Audun Hammersland.

Gode minner

Men skulemannen frå Tofterøy tek med seg mange gode og varierte minne frå tida på skulen, både som elev og skulemann.

– Korleis vert det å byrja på Stranda skule?`

– Eg skal fortsetja mi gjerning i administrasjonen, og eg har akseptert at det vert overflytting til Stranda, seier rektoren.

Med kulturmøte i kveld på Trellevik kystkultursenter med elevar, foreldre og besteforeldre, så føler rektoren at skulen får ei verdig avslutning.

I tillegg sit tidlegare rektor, Erling Toft, og skriv på skulehistoria i det siste nummeret av skuleavisa «Havsprøyt».

– Toft vil skriva ei historie kring skulen. Avisa kjem ut til ferien. Det blir eit fint skriv, seier Hammersland.

Byrja tidleg

Rektoren byrja tidleg å førebu alle dei berørte på skulen at ein til hausten skulle byrja på ny skule.

Den 12. april sette han i gang prosessen.

– Me kunne ikkje venta til 20. juni, etter kommunestyremøtet, med å førebu til nedlegging. Det ville blitt kaos. Eg ville gjera dette på ein ryddig måte. Som rektor er eg forplikta til å ivareta personalet og elevar, slik at denne planlegginga var viktig, seier Hammersland.

Han fekk lov av kommunen å setja i gang arbeidet.

Den 23. april gjekk det ut eit brev til dei føresette med informasjon om kva som skal skje i høve overflyttinga til Stranda skule.

– Dette er ein realitet som me alle må forhalda oss til, seier Leif Audun Hammersland.

av kai svellingen flatekvål

Leif Audun Hammersland byrja tidleg med prosessen kring nedlegginga av Tofterøy skule. Foto: Kai Svellingen Flatevkvål