GLESNES: Søndag veksla regnet mellom å hølja og sildra medan den frivillige ryddegjengen var i sving på festivalområdet på Glesnes.

– Først no har vi det veret som blei meldt for fredag og laurdag. No er det nesten berre gøy at det regnar, for det blir ekstra tydeleg kor heldige vi har vore, smiler pressesjef Helga Golten i Periferifestivalen.

Stor variasjon

– Det finst ikkje dårleg ver, berre stygge kler! ropar Morten Abel ut over ein tettpakka Bakke-plen.

Som så mange av artistane som gløda på scenen laurdag under Periferifestivalen, er han glad.

– Eg var her for to år sidan, og no er eg endeleg tilbake, seier han. Denne gongen med The September When.

Men alt klokka halv sju var plenen i kok. Dei som var heldige, kom då ut frå ei intim og intens oppleving med jazzmusikar Mari Kvien Brunvold i naustet til Arne Bakke. Medan publikum var på veg ut derfrå, sveiva Pogo Pops i gang på hovudscenen.

Vidare kom Elektrisk Regn, Real Ones, The September When og det surrealistiske tingingsverket «Bymann og stril», komponert av Jørgen «Dupermann» Træen. Kvelden blei avslutta med Big Bang.

– Det var enorm breidde og variasjon i årets festival. Mykje meir enn tidlegare, meiner Helga Golten.

Godt humør

Medan det var om lag 1.000 menneske inne på området fredagen, var det altså nesten utselt på laurdag.

– Vi hadde lenge tre billettar igjen. Då det var ein halv time igjen av Big Bang, kom det ein kar og kjøpte den tredje siste. Vi ler litt av at det berre var to billettar igjen, fortel Golten.

Ho er dessutan svært nøgd med publikum.

– Politiet fortel at dei nesten ikkje hadde noko å gjera, dei berre kosa seg. Det er alltid nokon som drikk for mykje, men det var lite tumultar. Folk var i godt humør, meiner Golten. Det hadde dei god grunn til.