– Eg går først og fremst for å treffa kjensfolk som eg sjeldan ser, seier Stian Andre Ekerhovd frå Ekerhovd i Fjell. Han kjem saman med broren Ørjan, som også går på sommarfesten for å treffa kjente. Sommarfesten er for mange ein plass ein må gå, uavhengig av kva konsertopplevingar som ventar.

1.000 porsjonar potetsalat

Det er stor variasjon i kveldens musikalske sjangrar. Utanfor det største konsertteltet i Skandinavia spelar dei lokale dansebanda Aristocats og Gruppesax vekselvis til dans mellom dei større konsertane som føregår inne i teltet. Dermed er det ikkje ein einaste stille pause i løpet av kvelden. Gjestene med VIP-billettar starta alt klokka halv seks, med grillmat frå Bergen Kokkenes Mesterlaug.

– Vi har laga potetsalat til 1.000 menneske, skryt Daniel Fortun frå kokkelinja på Sotra vidaregåande skule.

– Vi er berre med og hjelper til med det som trengst, seier Lillian Bjørkedal og Isabelle Skjelvik bak den varme grillen, der det no ligg hamburgerar.

– Det er gøy, folk er veldig venlege, meiner Isabelle.

Til og med tennene

– Han er jo prikk lik! ropar ei dame og ler. Killer Queen med vokalist Patrick Myers som Freddie Mercury blei i 1999 kåra til verdas beste hyllestband. Til og med tannstellet til Freddie Mercury er på plass.

– Betre erstatning kunne vi ikkje fått, meiner Tove Lægreid. Ho har funne vegen tilbake til bordet etter Killer Queen.

– Eg gler meg mest til Boney M, seier Trude Hole frå Berge i Sund, som har fungert som bordvakt ei stund.

Utover kvelden kjem Boney M på scenen, eller rettare sagt ein av versjonane av bandet som var store på 70-talet. Denne versjonen av Boney M kan skilta med eitt av originalmedlemmene, Maizie Williams.

Før Wig Wam får æra av å avslutta kvelden, slepp Øyvind og Astrid Haugen Lie frå Foldnes til med raplåta «Empire state of Sotra». Kva fell vel betre i smak på Sotra enn ein hyllest til Sotra?

Færre gjester enn i fjor

Rolf Øvretveit i Heilt Konge har berre lovord å koma med om gjester og medhjelparar.

– Sotra Sportsklubb og dei andre som har vore med, har gjort ein kjempejobb, rosar han. Også skjenkekontrollen og politiet er nøgde med avviklinga av arrangementet.

Øvretveit opplyser at om lag 3.000 menneske deltok på årets sommarfest. Det er 500 færre enn i fjor.

– Eg er ikkje skuffa, for det kunne blitt mykje verre. Hadde vi ikkje vore heldige med vêret, er eg sikker på at vi hadde gått med bortimot ein halv million kroner i underskot, seier Øvretveit. No håpar han på å unngå underskot.

– Vi har ikkje full oversikt enno, men eg trur vi går ut i balanse, seier Rolf Øvretveit.