Den 31 kvadratmeter store hytta ligg like ved Arefjordsvatnet ved Brattholmen i Fjell.

– Eg er frå Godvik, men som rørleggar jobbar eg mykje på Sotra. Så kvifor ikkje flytta over brua? spør Stensland. Det var i fjor sommar paret kom over hytta, som altså ligg sentralt på Litlesotra.

Helikopteridé

– Med heimekoseleg kjøkken, bad med snurredo, to sjarmerande soverom og hems er dette tidenes scoop, skriv Stensland i annonsen på finn.no.

Han var ikkje førebudd på responsen.

– Det er heilt sinnssjukt. Ein familie frå Nederland vil ha hytta, ein kar frå Austlandet vil flytta hytta til Stadt for å ha henne som surfehytte, tre ulike folk på Askøy er interesserte, to vil ha henne til Nordhordland, to vil flytta hytta lenger utover på Sotra. Ei polsk åleinemor ville berre flytta rett inn, smiler Stensland.

Han har sagt til alle som ringjer, at det ikkje er prinsippet om førstemann til mølla som gjeld.

– Det er den som kjem med den mest praktiske løysinga for flytting av hytta som får tilslaget, seier han. Den som ligg best an no, er ein mann frå Askøy som gjerne vil bruka helikopter.

– Ikkje veit eg om det finst eit helikopter her i regionenen som klarar å løfta ei hytte som sikkert veg nokre tonn, seier Stensland, som altså ikkje har bestemt seg enno for kven som får seg ei gratis hytte.

18.000 har sett annonsen

Paret gav i underkant av ein million kroner for tomta (inkludert hytta), som er på 660 kvadratmeter.

– Ei hustomt i Godvik-området ville fort ha kosta halvannan million, meiner Stensland. Han jobbar no med å få papir og søknadar klare for innsending til kommunen.

– På nabotomta er det for tida eit bustadhus under oppføring, og tomta vår er regulert for bustad. Så det går nok i orden, reknar Stensland med. Han hadde knapt trudd at nokon ville ringja på annonsen.

– No har vi 18.000 visningar på Finn. Men det gjenstår jo å sjå om vi finn ei god ordning, seier Are Stensland.