LANGØY: Svein Bergh har to hus under oppføring for tida i byggjefeltet på Langøy på vestsida av Fjell kommune. Det eine huset har fått vindaugo og dører på plass, det har ikkje hus nummer to.

Sto utanfor huset

– Vindaugo og dørene kom på tysdag, fortel tømrar Robert Låstad. Det var han som oppdaga tjuveriet då han kom på jobb i ni-tida torsdag morgon.

Borte er også ein propanbrennar med gassflaske og det heile.

– Og ei snømåke, seier Bergh syrleg.

– Men du er vel forsikra?

– Forsikra? Det snakkar vi ikkje om no, seier Bergh og peikar på huset som står utan tak, dører og vindaugo. Det er ikkje akkurat vanskeleg å koma seg inn, dessutan stod vindaugo og dørene stabla på pallar utanfor huset.

– Det er heilt vanleg å ha ting ståande slik. Verktøy låser ein jo inn, men slike store ting blir levert med kranbil. Ein tar ikkje med seg eit vindauge i neven, liksom, seier Bergh.

Langt frå uvanleg

Propanbrennaren sto på loftet, så tjuvane har også vore inne i huset. Låstad har sett tydelege spor i snøen etter tjuvane.

– Nike-sko, fortel Bergh.

Vindaugo og dørene er av merket Lyssand.

– Så om nokon får tilbod om å kjøpa nokre Lyssand-produkt til ein billig penge, bør dei bli mistenksame, meiner Bergh.

Dei fekk beskjed av politiet om å venta utanfor, så politiet fekk sikra seg spor.

Det er ikkje første gong verken Svein Bergh eller andre er blitt utsett for tjuveri frå byggjeplass.

– Då vi starta opp dette feltet, blei ei brakke tømt for smøreolje og verktøy for sju-åtte år sidan. Etter det har vi stort sett vore spart for den slags her ute, fortel Bergh.

– Er det vanleg at ein får tjuvgodset tilbake?

– Jau, det hender. Viss ikkje, er det eg som må ta kostnaden denne gongen, seier Bergh.

Såg sølvgrå varebil

Ei historie som verserer om Svein Bergh, er at han ein gong på 90-talet blei fråstolen ein boremaskin som han hadde leigd av eit anna firma. Han oppsøkte då ein person han mistenkte og gav ettertrykkeleg beskjed om kva som ville skje om boremaskinen ikkje dukka opp igjen.

– Jau, det stemmer det. Kort tid etter fekk firmaet ein anonym telefon om kvar dei kunne plukka opp boremaskinen. Så eg var vel ikkje så langt unna.

– Er det ein aktuell framgangsmåte i denne saka?

– Hadde eg visst kven det var, kunne dei forventa seg eit besøk, ja, lovar Bergh.

Ekstra irriterande er det at det ikkje berre er å få tilkjørt nye vindaugo.

– Det er vel ein tre vekers leveringstid på dei. No på vinteren er det kjekt å få husa tette, sukkar Bergh.

Litt utpå torsdagen får han melding om at ein av dei næraste naboane såg ein varebil, ein sølvgrå Toyota Hiace, rundt klokka halv sju torsdag morgon.

– Naboen skulle på jobb då han såg varebilen parkert akkurat der vindaugo sto stabla, fortel Svein Bergh. Har nokon tips i saka, håpar han dei tar kontakt med politiet.