På bussterminalen til Tide på Askøy har Rutebilhistorisk foreining nokre av sine gamle veteranbussar. Gamle travarar frå 50-talet og fram til 80-talet står stasjonert i den gamle garasjen til Tide. Foreiningsformann Steinar Natås smiler skjelmsk når han får 60-talsbussen til å putra.

– Denne er utruleg flott. Me har brukt fleire tusen dugnadstimar på denne, smiler Natås før han forsiktig ryggar bussen ut av den trange garasjen.

– Dagens bussar er lengre enn dei gamle, og dei nye passar ikkje inn i desse garasjane. Difor har me fått låna dei, fortel formannen.

Mange rutelag

I dag kjempar nokre få om konsesjonen for å køyra buss i Hordaland. Nokre år attende var det mange fleire selskap som køyrde buss.

– Då hadde me Åsane Billag, BNR, Bergen sporveier, Fana Os Milde og Øygarden Sotra Rutelag. Dei hadde kvar sin farge på bussane. Me har forsøkt å få tak i ein veteranbuss frå kvart selskap, seier Steinar Natås.

Men dei manglar eit par klenodium.

– Me har ikkje nokon bussar frå Øygarden Sotra Rutelag og Bergen Vest, seier formannen.

No ber han folk om hjelp.

– Om det er nokon som har ein slik buss ståande i ein stor garasje eller i hagen, så er me interesserte i å få koma å sjå på bussen. Er det moglegheiter for å restaurera den, så er me interesserte i å overta bussen, seier Natås.

Veteranbusslaget er på jakt etter bussar frå 80-talet og eldre.

– Eg trur noken eksisterer enno, smiler Steinar Natås.

Gamle bussar går godt

Dei fleste bussane som veteranbusslaget reparerer og set tilbake til original stand, kan køyrast. Den eldste bussen er frå 20-talet, og sjølv om den i utgangspunktet står som museumsgjenstand, kan den køyrast óg.

– Den eldste bussen me har, gjekk i rute i Fana, fortel Natås.

RHF Hordaland har 175 medlemmer. Dei restaurerer bussane sine sjølve og er opptatt av at dei kan brukast.

– Me leiger ut bussane våre til bryllup og andre festlege høve, seier Natås.

Han legg til at den beste måten å ta vare på ein gamal buss på, er å bruka den.

Han klappar kjærleg på bussen me sit i, ein Scania-Vabis. Den er frå 1962 og gjekk mellom Bergen og Norheimsund.

– Denne fant me i Os. Den vart brukt som campingbuss, smiler Natås.

– Mykje arbeid å restaurera den?

– Me måtte totalrenovera den. Det tok kring 3000 dugnadstimar, smiler Steinar Natås.

Er det nokon som har ein slik buss, så kan ein ta kontakt med journalisten i Vestnytt eller RHF Hordaland direkte.