Dette blei bestemt på eit styremøte i Fjell Frp denne veka.

– Vi ønskjer ikkje denne situasjonen, men vi kan ikkje halda på slik i all evighet, seier leiar Trude Farstad i lokallaget.

Kan bli ekskludert

Det går no likelydande brev frå leiinga i Fjell Frp til dei to.

– Dei får 14 dagar på seg til å leggja fram mappa. Gjer dei ikke det, vil vi måtta ta vidare steg i samarbeid med fylkesstyret i Frp, seier Farstad.

– Kva inneber det?

– Ifølgje vedtektene kan ein bli suspendert eller ekskludert dersom ein motarbeider partiet. Alle medlemmer må forhalda seg til vedtektene, seier Farstad.

Det er arbeidet med den såkalla «mappa» og offentlege uttalar frå Herland og Indrevik om systematisk forskjellsbehandling i byggjesaksavdelinga i Fjell kommune som er grunnlaget for konflikten.

Framgangsmåten

Då både kontrollutvalet i Fjell kommune og styret i Fjell Frp ba om å få dokumentasjonen på den påståtte ukulturen i byggjesaksavdelinga, viste det seg å bli vanskeleg å få sjå mappa.

– Alle kan samla på offentlege dokument. Men kvifor samla i så mange år og påstå at ein har bevis, utan å gå vidare med det? spør Trude Farstad retorisk. Ho meiner det er vanskeleg å bevisa forskjellsbehandling.

– For ingen byggjesaker er heilt like. Å bevisa at det bevisst er gjort feil, er endå vanskelegare, meiner ho.

Har aldri sett mappa

Farstad understrekar at verken ho eller gruppeleiar Vidar Arnesen har sett mappa, slik Herland hevda i torsdagutgåva av Vestnytt.

– Det stemmer at dei kom med ein powerpoint i styret der Indrevik presenterte nokre enkeltsaker. Men det var trekt ut av heilskapen. Eg kunne ikkje på grunnlag av den presentasjonen trekkja konklusjonar om det var gjort feil eller ikkje, seier Farstad.

Vidar Arnesen sat ikkje i styret på det tidspunktet.

– Vi veit ikkje ein gong kva farge det er på denne mappa, seier Farstad.

Ho meiner det er heilt greitt å vera usamde om saker.

– Men vi må alle jobba for partiets beste, seier Farstad.

Viktig person for Frp

Georg Indrevik har vore ein viktig person og ressurs for Fjell Frp gjennom mange år. Då han gjekk ut av kommunestyret i haust, varsla han at han ville vera minst like politisk aktiv som før og jobba i kulissane. Som leiar i seniorgruppa har han også møte- og talerett i styret i Frp.

– Korleis er det å trua ein tidlegare varaordførar med eksklusjon?

– Han er ein ressurssterk person med mykje kunnskap. Men ein må bruka ressursane sine på riktig måte. Dette er ein beklageleg situasjon, eg ønskjer ro og orden, seier Trude Farstad.

Kritisk til handteringa

– Interne problem skal løysast internt, seier Øyvind Herland. Han reagerer på at leiar i Frp stadfestar overfor pressa at det blir teke grep mot han og Indrevik.

– Dette er berre til skade for partiet, meiner han.

Også Georg Indrevik meiner saka burde vore løyst internt.

– Eit eventuelt vedtak om eksklusjon må heilt til sentralt hald i partiet. Eg tvilar også på om fylkesstyret vil ta dette opp som sak, seier Indrevik. Han ser ikkje at han eller Herland har gjort noko som kvalifiserer til å bli ekskludert frå partiet.

– Eg føler det vi har gjort, er rein Frp-politikk, seier Indrevik.

Han forstår ikkje kvifor han blir pålagt å leggja fram mappa.

– Den er eigedomen til Øyvind Herland. Partiet kan ikkje krevja å få den, meiner Indrevik.

– Løgnaktige påstandar

Indrevik tar avstand frå bruken av ordet «korrupsjon».

– Dette har eg tatt opp med Trude Farstad før. Det er løgnaktige påstandar, vi har ikkje brukt det ordet. Vi har hatt store problem med teknisk etat i Fjell i mange år, noko kan skuldast sakshandsamingsfeil, andre ting kan vera grov uforstand i tenesta, seier Indrevik.

– De har snakka om systematisk forskjellsbehandling, og at Ap-folk oftare får godkjenning. Er ikkje det verre enn «uforstand i tenesta»?

– Ein skal vera forsiktig med å karakterisera slike ting, seier Indrevik.

– Er du skuffa over trusselen om eksklusjonsprosess?

– Eg veit ikkje kva eg skal kalla det. Hadde eg vore i leiinga, ville eg ikkje gjort det på denne måten, seier Indrevik.

Heller ikkje Herland kan sjå at han har gjort noko som kvalifiserer til utkasting.

– Korleis reagerer du på trusselen om eksklusjon?

– Det vil tida visa, seier Herland.

– Kan du utdjupa litt?

– Det vil visa seg korleis ein slik prosess vil gå, seier han.

Har ikkje bestemt seg

Herland understrekar at mappa er laga på lovleg vis.

– Dette er mapper bygd opp etter at folk har tatt kontakt med meg for å få hjelp. Det kjem stadig fleire, eg har knapt tid til anna, seier Herland.

Han meiner det er Frp-politikarar si oppgåve å hjelpa innbyggjarane.

– Folk er redde for å seia noko når dei skal senda inn søknad til kommunen. Eg trur det er mindre redsel i Nord-Korea enn i Fjell, spøker Herland.

– Er du skuffa over partiet ditt?

– Eg har aldri blitt kasta ut av ein restaurant ein gong. Grunngjevinga må ein ta seg av sentralt i partiet, seier han.

Herland har ikkje bestemt seg for om han no vil leggja fram mappa eller ikkje.