Sist laurdag kunne Vestnytt melde at det sannsynlegvis blir Perferifestival på Glesvær også i år. No er det heilt sikkert. Denne veka bestemte styret seg for å vende tommelen opp.

– Vi arrangerer Periferifestival på same staden og med same konseptet som i fjor, seier Helga Golten, ein av primusmotarane bak festivalen.

Om konseptet blir det same, så blir det likevel ikkje ein blåkopi av opplegget frå i fjor.
– Det blir nok ikkje nokon ro-inn-kino, men det blir kanskje noko anna ro-inn, ler Golten.

Opplegget med sal av kystmat har dei derimot tenkt å halde på.
– Det var svært vellykka, og vi ser på det som ein del av profilen vår. Den skal vi halde på.

Men når det gjeld artistane, er ikkje Golten like meddelsam.
– Vi har kontaktar, men vi ikkje skrive kontraktar enno, det kjem vi tilbake til.

Då festivalen var avslutta fjor, var arrangørane veldig i tvil om dei skulle gjenta suksessen og i tilfelle kor ofte.
– Vi måtte tenke litt, kule han litt og kvile på laurbæra.
Når dei no har bestemt seg for å satse allereie i år, er det fordi ting har falle på plass.  
– Vi har fått nokre fleire kontaktar. Vi har organisert fleire frivillige og kjem til å bringe dei inn i prosessen tidlegare, forklarer presseansvarleg Helga Golten.