Brannvernet er på staden og sløkkjer etter at turgåarar i Nordsjøløypa i tre-tida oppdaga at det kom røyk frå deler av området som brann sist veke.

– Det er meir vanleg at slike brannar blussar opp igjen enn at dei ikkje gjer det, kommenterer vakthavande brannsjef Nils Anders Mæland i Sotra brannvern. I halv seks-tida var det berre brannmannskap frå Sund på staden.

– Vi har bede om ti personar frå Sivilforsvaret, men vi konkurrerer nok med brannen i Sveio når det gjeld mannskap og ressursar, seier Mæland. Førebels er det langt frå fare for hus i Sund.

– Det brenn i eit område der det alt har brent, og førebels er det mest røyk og lite flammar. Mannskapet går inn frå Golta, derfrå er det ein knapp time å gå med utstyret, seier Mæland. Området der brannen blussa opp igjen, ligg ved Lauvvatnet, like vest for Kausland. Slik situasjonen er no, er brannen under kontroll.

– Brannar er ingen eksakt vitskap, og det kan dukka opp røyksøyler også andre stader i området. Men per no har vi kontroll, seier han. Dermed er det førebels heller ikkje aktuelt å tilkalla helikopter.

Det bles kraftig frå nord og nordvest.

Brannmannskapa gjekk frå plassen laurdag ettermiddag. Sidan då har ikkje området vore overvaka.

– Då vi gjekk frå staden laurdag, hadde det vore svart lenge. I tillegg bur det folk i området som varslar om dei ser røyk. No held vi eit auga med heile området, seier Nils Anders Mæland.