Ordføraren i Øygarden er styreleiar for Regionrådet vest, det nye forumet for samarbeid mellom Fjell, Sund, Øygarden og Askøy. Tidlegare denne månaden kunngjorde Fylkesmannen i Hordaland at regionen får til saman 700.000 kroner i støtte til ulike samarbeidsprosjekt.

– Pengane er viktige for prosjekta, enten det gjeld barnevern eller planfagleg samarbeid. Like viktig er den støtta Fylkesmannen signaliserer til denne regionen og arbeidet me er i gang med gjennom det nye regionrådet, meiner Olav Martin Vik.

Samarbeidsprosjekt

For det er ikkje i utgangspunktet enkelt å trekka til seg offentlege midlar til samarbeid mellom kystkommunane vest for Bergen. Vik opplever særleg at Hordaland fylkeskommune held eit stramt grep om pengesekken.

– Der er nok ei oppfatning på fylket om at desse kommunane har så store ressursar at dei greier seg sjølv. Men hjå staten sin mann har me hatt hell med søknader før. Me er sjølvsagt glade for støtta også denne gongen, seier styreleiaren i regionrådet.

Det er fire prosjekt i regi av Regionrådet vest som no får pengestøtte frå Fylkesmannen:

* 400.000 kroner til eit prosjekt for å innføra felles sakshandsaming for plan- og byggesaker.

* 100.000 kroner til interkommunalt samarbeid om utvikling av kart.

* 100.000 kroner til tiltak for å førebygga kriminalitet i regionen.

* 100.000 kroner til å gå gjennom dagens organisering av barnevernet og synleggjera løysingar for eit betre og meir effektivt barnevern.

Meir makt lokalt

– Når det gjeld barnevernet meiner me at målet må vera ei teneste som er fullt ut kommunal. Då treng me eit sterkare samarbeid mellom kommunane i regionen, slik at me får breie og sterke fagmiljø, meiner Olav Martin Vik.

Barnevernet er i dag organisert som ei todelt teneste mellom stat og kommunar. Denne ordninga møter kritikk for skeivfordeling av ressursane. Kommunane opplever at dei må ta brorparten av dei tunge sakene, medan det statlege BUF-etat sit med størsteparten av makt og ressursar.

– Det me treng er ei effektiv førstelinjeteneste ute i kommunane. Det er dei medarbeidarane som møter ungane andlet til andlet me treng fleire av, ikkje eit stort bakland av papirflyttarar, meiner Vik.

Han vil ha mindre makt hjå staten og meir ansvar ut til dei som sit tett på brukarane. Med meir ressursar og mynde til å velja tiltak for dei barna som treng omsorg utanfor eigen heim, får ein også behov for eit større fagmiljø lokalt.

Det er her samarbeidet i regionen kjem inn.

– Ein treng å drøfta vanskelege saker med eit større fagmiljø. Det kan me få til lokalt gjennom samarbeid i regionen, seier styreleiaren.

Målretta ungdomsarbeid

Fjell, Sund og Øygarden har allereie eit samarbeid om tiltak for å førebygga kriminalitet og rusmisbruk hjå barn og unge, mellom anna gjennom ein såkalla SLT-koordinator. No får dei pengar til å samordna dette og andre tiltak med Askøy kommune.

– I tillegg til arbeidet med å samordna breie tiltak mot ungdom, treng me tilbod som er retta meir direkte mot barn og unge i utsette miljø. No får me støtte mellom anna til auka samarbeid med frivillige lag og organisasjonar i dette arbeidet, seier Olav Martin Vik.

I Fjell har leiar Vidar Arnesen (Frp) i komite for drift lenge etterlyst meir ressursar til barnevernet lokalt. Han vil framfor alt ha meir pengar til kvar kommune, men er open for større samarbeid i regionen.

 – Så lenge dei tilsette er med i prosessen og ønskjer eit slikt samarbeid kan det bli bra. Særleg med tanke på å dra vekslar på ulik kompetanse, slik at ein samla får eit betre fagmiljø i dei fire kommunane, seier Vidar Arnesen.

Han meiner at barnevern er eit av dei felta der behovet for offentleg omsorg og utgiftene til dette berre vil veksa i åra som kjem. Arnesen meiner det er positivt at fleire vert fanga opp og understrekar kor viktig det er å gripa tidleg inn når barn lir.

– For å få dette til treng me samarbeid. Sjølv er eg overtydd om at desse og andre oppgåver ein dag vert så store at kommunane må slå seg saman. Den overgangen vert lettare viss me allereie samarbeidar tett, meiner Vidar Arnesen. 

Brorparten av pengane frå Fylkesmannen går altså til eit prosjekt for felles sakshandsaming i plan- og byggesaker. Men styreleiar Olav Martin Vik gjev ingen signal om at auka samarbeid skal føra til felles fageiningar i region vest.

– Medarbeidarane må sjølvsagt med i arbeidet, men me ser ikkje føre oss ei felles eining for til dømes byggesak. Men me kan avlasta kvarandre, utveksla kompetanse og saman få eit fagmiljø som er så stort at det vert lettare å rekruttera og halda på fagfolk, seier Vik.